SUHAR Koruak Lituaniara eramango du bere proposamena eta Vilnan parte hartuko du lehen aldiz "Open To The World’25" jaialdian

SUHAR Korua, Esteban Urzelaik zuzendua, Vilnara joango da "Open To The World’25" jaialdian parte hartzeko, non ISM Bel Canto Choir Vilniusekin batera kontzertua eskainiko duen Santa Katalina eliza historikoan

Datorren azaroaren 30ean, SUHAR Koruak, Etxepare Euskal Institutuaren laguntzarekin, euskal musika koralaren indarra eta berezitasuna erakutsiko ditu berriro gure mugetatik kanpo. Abesbatza Lituanian arituko da lehen aldiz, Open To The World’25 jaialdian. Ziklo horrek nazioarteko taldeak bilduko ditu Vilnan, proposamen berritzaileak eta kalitate artistiko handikoak dituztenak, hala nola, Rundfunkchor Berlin (Berlingo Irratiko Abesbatza), munduko abesbatza profesional onenetakoa eta hiru Grammy sari irabazitakoa, Zero8, Ringmasters eta Lemon Squeezy, munduko barbershop lehiaketako azken irabazlea.

Bisita amaitzeko, kontzertu berezi bat eskainiko dute St. Catherine's elizan, proiektuaren anfitrioia den ISM Bel Canto Choir Vilniusekin. Esteban Urzelai zuzendariak gonbidapen honen balio artistiko eta sinbolikoa azpimarratu du: "Vilnan izango dugun presentzia beste urrats bat da eraikitzen ari garen bidean: euskal musika korala publiko berriekin partekatzea. Nazioarteko hitzordu bakoitza nor garen eta  ahots grabeen kantu korala nola ulertzen dugun adierazteko aukera bat da".

SUHAR Koruak Vilnan aurkeztuko duen errepertorioak hainbat estilo uztartzen ditu errepertorio koralaren barruan. Kontzertuan nazioarteko abesti herrikoien moldaketak, obra garaikideak, euskal pieza tradizionalak eta Eguberri garaiko musika bilduko dira, baita garai desberdinetako konposizio sakratuak ere, Simon & Garfunkelen korurako moldatutako lanak, Ipar Amerikako eta Europako egileen piezak, Goizeko Izarra eta Sorgin Dantza bezalako euskal errepertorioko obrak eta Morten Lauridsenen O Magnum Mysterium.

Open To The World nazioarteko taldeak Vilnan biltzen dituen proiektu bat da, truke artistikoak sortzeko eta lituaniarrei abesbatzen errepertorioak hurbiltzeko helburuarekin. Jaialdiaren edizio bakoitzean, gonbidatutako abesbatzen eta ISM Bel Canto Choir Vilniusen arteko kontzertu bateratuak izaten dira, eta elkarlanerako eta askotariko programak aurkezteko gune bat eskaintzen du.